by

Hahú aban sarani sira iha Arquídiosese  Metropolitana Dili bele tuir misa

Dili – Archebispo Arquidiosese Metropolita Dili, Dom Vírgilio do Carmo da Silva SDB, kinta(24-04), hasai ona desizaun hodi reativa hikas misa no selebrasaun sakramentál sira hahú iha domingu loron (25-04) aban, iha paróquia sira ne’ebé pertense ba Arquídiosese Metropolitana Dili.

Ho ida ne’e hau deside atu reativa fali misa ba públiku no selebrasaun sakramentál sira hahú iha domingo do Bom pastor 25 de abril 2021”, lee iha komunikadu imprensa husi Secretáriado Kâmara Eklesiástika Arquídiosese Metropolitana Díli.

Dom Virgílio do Carmo da Silva hasai desizaun ne’e, hafoin hamutuk ho pároku no vigáriu parokiál  sira husi vigararia de Díli, rona esplikasaun husi reprezentante sira Ministério de Saúde no sala de situasaun Sentru Integradu Jestaun Krize (SIJK), iha loron  kinta 22  fulan ne’e.

Reativasaun ba misa selebrasaun sakramentál sira bazeia mos ba iha suspensaun konfinamentu obrigatóriu ne’ebé Governu deklara liu husi Prezidénsial Konsellu Ministru VIII Governu Konstituisionál iha dia 08 de abril de 2021”, sita husi Komunikadu ba Imprensa.

Maske reativa ona misa, Archebispo Arquidiosese Metropolita Dili,  husu sarani sira nafatin  kumpri medida prevensaun Covid-19 sira hanesan,  uza maskara, fase liman ho sabaun ka hand sanitizer no mantein distansiamentu sosiál.

Dom Virgílio mos husu pároku sira atu multiplika misa dominikál hodi evita halibur ema barak. Alénde pároko sira, tenki limita partisipasaun sarani nian, iha iha selebrasaun sakramentu sira , liu liu iha Batismu no Kazamentu.

Komunikadu ne’e bele suspende kualker momentu , wainhira situasaun sars Covid2/ Covid19 obriga”, esplika iha Komunikadu ba Imprensa.

Jornalista : Oki Ganna

Editóra: Donya Jeremias

 

Kona-ba Autor: Radio Comunidade Comoro

Gravatar Image
Radio Comunidade Comoro (RCC) nu’udar organizasaun mídia komunitáriu ne’ebé non-lukru no hetan inisiativa no partisipasaun másimu husi komunidade, liu-liu joventude sira ne’ebé iha ispíritu voluntarizmu a’ás hodi kontibui ba vizaun no misaun RCC nian.

Comment