by

Unijma koleta tan fore keli hektares ha’at iha Bobonaro

Díli  – Uniaun Nasional Juventude Maubere (Unijma Ativista Pro – RDTL) no Organizasaun  Popular Trabaillador Timor (OPTT) koleta fore keli hektares ha’at (4),  iha aldeia wepo suku Tapo postu administrativu Bobonaro munisipiu Bobonaro kuarta 21/04/2021. Objektivu husi halao koperativa nee nudar tulun bo’ot ba estadu no governu  atu kore dependente ekonomia husi rai liur hodi nune’e povu sira labele hamlaha bebeik.

“Objektivu husi koperativa ne’e, tamba Republika Demokratika Timor Leste depedensia demais  liu ba rai liur,  liliu povu kiik sira ne’e, povu kiik sira nee depedensia liu ba nia estadu no sira nia estadu no governu mos depedensia liu ba ekonomia rai liur, tamba sosa sasan hanesan fos hotu iha rai liur,”hateten Ivo Siqueira.

Tuir Prezidente OPTT ne’e dehan ho esforsu tomak  halao asaun koperativa nee nuudar tulun boot ba estadu no governu, atu bele hasai povu husi kiak no hamlaha.

“Koperativa ida nee ami esforsu tomak tulun boot ida ba estadu, governu no povu, para  ita bele hasai povu husi kiak mukit no hamlaha no baruk ten. So nunee maka ita bele hasae kresimentu ekonomia rai laran no ita bele hasae produsaun rai laran, so nunee maka ita nia estadu labele monu,” Nia afirma.

Enkuantu nia salienta sira koleta fore keli hektares ha’at ne’e nudar faze ida tama ba diversifikasaun ekonomia rai laran.

“Ohin loron ami koleta tan fore keli ida nee ami tama ona diversifikasaun ekonomia tamba ami laos halo toos deit halo natar deit laos hakiak animal deit, maibe ohin ami koleta tan fore keli ne’e nudar modelu diak ida, tamba sa fore keli ida ne’e ami sei halo ba tempe   sei halo ba tahu no sai ba sutati, tamba nee modelu diak ida  neebe Timoroan hotu hotu nebe abandona imi nia moris fatin, imi nia toos imi nia natar no imi abandona fatin ba hakiak animal , diak liu ita hotu hotu fila ida idak nia rai, kintal toos no natar hodi bele garante ita nia independensia ekonomia,”Sujere Prezidente.

Jornalista  :Herculano Gomes

Editor        : Eryck Gomes

Kona-ba Autor: Radio Comunidade Comoro

Gravatar Image
Radio Comunidade Comoro (RCC) nu’udar organizasaun mídia komunitáriu ne’ebé non-lukru no hetan inisiativa no partisipasaun másimu husi komunidade, liu-liu joventude sira ne’ebé iha ispíritu voluntarizmu a’ás hodi kontibui ba vizaun no misaun RCC nian.

Comment