by

TOTM Apoiu Ai-Han Vítima Inundasaun Iha Aimutin

Díli– Ekipa  voluntáriu Timor –Oan Tane Malu, oferese nesesidade bázika ba estudantes no komunidade balu ne’ebe  difisil hetan ai-han iha situasaun serka sanitária no afetadu husu kalamidade públiku ne’ebe  akontese iha semana kotuk, Atividade fahe ai-han bázika ne’e hala’o iha bairu aimutin sentrál, suku komoro Tersa, 20/04/2021.

Koodenador terrenu TOTM, Herculanu Asala Vicente, hateten intensaun husi apoiu ne’e mak, nu’udar timor-oan, presiza ajuda malu iha situasaun difisil sira hanesan ne’e, presiza apoiu malu, labele  hein governu , no buka mak krítika deit governu, maibe sidadaun ne’ebe diak, tenki fo  mos solusaun hodi apoiu governu.

 

La iha Intensaun seluk husi apoiu ne’e, maibe ita senti katak  nu’udar sidadaun, no nain ba rai ida ne’e, iha situasaun kursial ou difisil hanesan ne’e, ita labele dehan husik governu deit mak hare, no  buka krítika governu deit, maibe nu’udar sidadaun iha rai ida ne’e  tenki fo mos solusaun ba ita nia governu.’’ Hatete koordenador TOTM ba jornalista sira iha bairu aimutin sentrál Tersa,20/04/2021.

 

Enkuantu Koordenador ne’e hakle’an, bainhira krítika deit, la fo solusaun ne’e signifika la’os nain ba  rai ida ne’e, tanba ne’e iha situasaun serka sanitária no inundasaun labele hein deit governu, maibe presiza hotu-hotu nia apoiu ba malu.

Se karik ita hakarak mak krítiku deit, entaun ita la’os nain ba rai ida ne’e,maibe iha momentu serka sanitária no inundasaun ita hare,no hein governu ne’e bainhira, mak ita nia maluk sira ne’e afetadu ba inundasaun no estudante sira ne’ebe mak susar ba ai-han iha serka sanitária ne’e bele hetan apoiu lalais, tanba ne’e nu’udar sidadaun iha rai ida ne’e presiza ita hotu nia reposavilidade, liu-liu iha situsaun difisil sira hanesan ne’e.” nia dehan

Iha fatin hanesan Romariu Da Silva nu’udar benefisiariu ba apoiu ne’e , hato’o agradese wain ba grupu Timor-Oan Tane Malu ne’ebe ho laran luak hakat ona ba sira nia fatin, hodi oferese ai-han uitoan ba sira.

Ami agradese tebe-tebes ba maun sira nia laran diak, ne’ebe ohin loron to’o duni ami nia fatin hodi fo netik ai-han, maske dala barak ema dehan ne’e uitoan deit, maibe nu’udar umanu ami agradese tebes.”

Grupu Timor-oan Tane-Malu planea ona, tempu tuir mai kontinua fo apoiu ba estudantes iha serka sanitária  no komunidade sira ne’e afetadu  ba dezastre natural.

Sasan ne’ebe ekipa voluntáriu Timor-oan Tane Malu oferese ba benefisiáriu sira mak hanesan fos saka 7 no supermi dos 7.

 

Reportajen: Donya Fernandes , Jana Brites

Editor/a: RCC

Kona-ba Autor: Radio Comunidade Comoro

Gravatar Image
Radio Comunidade Comoro (RCC) nu’udar organizasaun mídia komunitáriu ne’ebé non-lukru no hetan inisiativa no partisipasaun másimu husi komunidade, liu-liu joventude sira ne’ebé iha ispíritu voluntarizmu a’ás hodi kontibui ba vizaun no misaun RCC nian.

Comment