by

Atu povu labele hamlaha, TL labele depende ekonomia estranjeiru

Vikeke   – Uniaun Nasional Juventude Maubere(UNIJMA Ativista Pro – RDTL), koleta batar hektares  ha’at (4),  iha aldeia zona Daruloi   suku Waitame munisípiu  Vikeke Domingu, 18/04/2021.

Alende ne’e Prezidente Organizasaun Popular Trabaillador Timor (OPTT), Ivo de Jesus Siqueira hateten  objektivu husi halao koperativa nee, nu’udar pasu diak ida hodi hakat ba justisa ekonomia, atu Timor – Leste labele parazita liu ba ekonomia estranjeiru, tamba  iha aspeitu  politiku  Timor – Leste ukun rasik a’an ona, maibé  ekonomikamente TL  sei dependente liu ba produtu importasaun husi rai liur, tamba ne’e povu sira kontinua mukit, kiak, no  hamlaha  iha nia rain rasik.

“Ami koiletan tan batar  hektares 4 iha zona daruloi  suku Waitame postu administrativu Uatulari  munisipiu Vikeke, obejektivu husi koperativa ne’e Repúblika Demokrátika de Timor –  Leste, nu’udar estadu soberanu, nune’e ita tenki dezenvolve ita nia ekonomia rasik, maibé realidade oin seluk fali. Politikamente ita ukun rasik a’an ona,  enkuantu hare husi aspeitu ekonomiku ita seidauk ukun a’an, “tamba sa”, tamba Timor – Leste ida ne’e parazita fali ba  ema nia ekonomika estranjeira. Nune’e koperativa ida ne’e povu ki’ik sira ne’ebe servisu hamutuk ne’e nia rejultadu diak la halimar, ne’e pasu diak ida  hakat ba justisa ekonomia “tamba sa” iha timor leste iha grupu ki’ik oan ida mak kaer poder iha uma diak, Iha osan barak,  iha kareta luxu, iha eskola diak, maibé  povu maioria ne’ebe mak iha Timor –  Leste sei kiak,mukit, no hamlaha nafatin iha nia rain rasik,”Tenik Ivo de Jesus Siqueira.

Tan ne’e responsavel maximu  Organizasaun Trabaillador Timor ne’e alerta ba estadu, governu igreja atu orienta no eduka povu sira ne’ebé hela iha kapital nasaun ne’e,  atu fila ba ida idak nia munisípiu, hodi halo to’os no natar inklui hakiak animal, nune’e labele kiak mukit no hamlaha.

Enkuantu Maski Timor Leste aplika estadu emerjensia no serka sanitáriu, maibé masas organizasaun husi munisípiu sanulu resin rua inklui RAEOA kontinua halao atividade  koperativa iha kada rejiaun, nune’e bele hasae produsaun alimentar iha nasaun ne’e, atu labele tane liman deit ba governu.

 

Maibe Tuir planu  husi aktividade koperativa nee organizasaun Umijma ne’e mos sei koleta tan batar no hare iha rejiaun 13.

Durante situasaun Covid -19 organizasaun Unijma mos koleta ona, batar no hare iha munisipiu Baukau,Lospalos, Vikeke no Kovalima.

 

Jornalista :Herculano Gomes

Editór        :Eryck Gomes

Kona-ba Autor: Radio Comunidade Comoro

Gravatar Image
Radio Comunidade Comoro (RCC) nu’udar organizasaun mídia komunitáriu ne’ebé non-lukru no hetan inisiativa no partisipasaun másimu husi komunidade, liu-liu joventude sira ne’ebé iha ispíritu voluntarizmu a’ás hodi kontibui ba vizaun no misaun RCC nian.

Comment