by

Atu hasai povu husi kiak, hamlaha, governu presiza tuir modelu Unijma

DILI   –  Uniaun Nasional Juventude Maubere(UNIJMA Ativista Pro – RDTL), koleta batar hektares ha’at (4),  iha munisipiu Vikeke Postu Administrativu Uatukarbau  Kinta 15/04/2021.

Alende  ne’e Prezidente Organizasaun Popular Trabaillador Timor (OPTT), Ivo de Jesus Siqueira Esplika objektivu husi halo to’os no natar ne’e atu hasae produsaun aihan no hametin baze ekonomia iha rai laran, hodi bele hasai povu husi kiak no hamlaha, husi koperativa  toos ne’e nudar fo ezemplu diak  ba estadu no governu bele halo tuir.

“Ami koiletan tan batar  hektares haat iha postu administrativu Uatukarbau munisipiu Vikeke, obejektivu ami halo koperativa ne’e primeiru  RDTL ninia baze ekonomika maka agrikultura, tuir batar fulin, hare fulin neebe mak hetan iha emblema nasional, koperativa atual hanesan ne’e so servisu hanesan nee hasai sira nia aan nee husi kiak no mukit hamlaha no baruk ten,  i nunee koperativa nee nudar modelu diak ida ba estadu no Governu, igreja no ba povu tomak neebe mak mai bou hamutuk   nebe nakonu iha sidade Dili.

Maski nunee Prezidente nee  dehan, povu sira labele tanis no labele eziji deit ba governu atu ajuda fos, maibe oinsa mak povu toos,nain sira bele halo rasik natar no toos iha ida idak nia fatin, hodi nunee labele eziji ba estadu no governu.

“Tamba sa mak imi tenki tanis hakilar hamlaha eziji ba estadu eziji ba governu, tamba imi iha moris fatin imi iha natar iha toos no iha plantasaun oi-oin husik tiha mai bou hamutuk iha sidade Dili nee mak imi hamlaha,”Hateten Ivo.

Ho ida nee Ivo de Jesus Siqueira nee mos sujere ba povu sira husi munisipiu 12 inklui RAEO nebe bou hamutuk iha sidade Dili atu fila ba ida idak nia munisipiu, hodi tama natar no toos nunee labele infrenta hamlaha.

“Nune dala ida tan husu ba maluk sira husi munisipiu sanulu resin rua no RAEOA nebe ohin loron bou iha sidade Dili nebe fila ona, Baukau Vikeke Lospalos Manatuto, fila ba imi nia moris fatin, Aileu Ermera Kovalima Bobonaro fila ba imi nia moris fatin hodi nunee imi nia liman tenki tama natar tama toos inklui hakiak animal, hodi nunee mak imi bele hetan moris diak, nunee imi bele hetan benefisiu husi toos no natar inklui hakiak animal ida nee tamba sa? So nunee maka ita nia estadu ita nia governu  bele kore dependensia husi rai liur, tamba sa, fos husi rai liur, ayam potong husi rai liur, naan karau husi rai liu, no seluk tan, tan ida nee mak halo ita kiak no mukit hanesan nee,”dehan Ivo de Jesus Siqueira.

Tamba nee prezidente OPTT husu ba estadu no governu atu orienta povu sira nebe bou iha kapital Dili hodi  servisu hamutuk ho  organizasaun Unijma sira atu halo toos no natar , nunee bele hasae  produsaun aihan iha rai laran nune Timor Leste bele kore an husi ekonomia  estatranjeiru.

“Husu estadu husu governu povu tomak nebe bou iha sidade mai ona ba servisu hamutuk ho CPD -RDTL Unijma hamutuk mak bele, se ami mesak deit labele, tamba ami laiha kbiit tomak iha estadu no governu mak iha kapasidade, iha fasilidade bele halo toos, halo natar inklui hakiak animal, hodi nunee ita bele hasae  produsaun aihan iha rai laran no aumenta ba kresimentu ekonomia nune ita bele moris diak, ita nia ekonomia tenki hamrik iha ain leten no labele hamrik fali iha rai seluk nia ain leten,”Nia informa.

Rejultadu husi koperativa nee  balun fo ajuda ba ema  vulneravel sira,  no husi  rejultadu nee  mosbalun rai iha armajen iha munisipiu Vikeke.

Husi koperativa nee sira  mos hakiak animal hanesan  karau bibi fahi manu no seluk

 

Jornalista   :Herculano Gomes

Editor          :Eryck Gomes

Kona-ba Autor: Radio Comunidade Comoro

Gravatar Image
Radio Comunidade Comoro (RCC) nu’udar organizasaun mídia komunitáriu ne’ebé non-lukru no hetan inisiativa no partisipasaun másimu husi komunidade, liu-liu joventude sira ne’ebé iha ispíritu voluntarizmu a’ás hodi kontibui ba vizaun no misaun RCC nian.

Comment