by

SS kontinua estende, PNTL bandu sidadaun sira sai husi Díli

Díli – 02 abril 2020 – Sexta dader ne’e Polísia Nasional Timor-Leste(PNTL),  ne’ebé destaka iha pontos entrada no saída  sira iha kapital Díli nian hanesan Tasi tolu, Hera no Manleuana,  haruka fila sidadaun besik rihun ida resin ne’ebé tenta atu fila fali ba munisípiu tamba la aguenta ona serka sanitária iha kapital Díli.

Tuir Komandante Polísia Nasional Timor-Leste(PNTL), Komissáriu Faustino da Costa, PNTL bandu sidadaun sira ne’e atu labele fila ba munisípiu tamba Serka Sanitária iha Díli seidauk hotu. Além de ne’e, atu evita mos propagasaun Covid-19 tamba komunidade sira halibur malu barak iha ponto entrada sira.

“Agora ita hotu akompaña katak governu  halo ona extensaun ba serka sanitária  liu liu ba kapital Díli ba loron 14 tan ka semana  rua tan ne’ebé  la signifika katak dia  2 ne’e  hotu ona. Maibé kontinua tan loron 14 ho interpretasaun ne’e  mak implika  komunidade sira hanoin, laos deit iha tasi tolu maibe kuaze postu  fronteira sira hotu iha dalan sira ne’ebé  iha Díli atu sai ba munisípiu  nakonu los ho ita nia komunidade sira ne’ebé hakarak atu hakat liu ba munisípiu.  Tanba sira hanoin dia 1 atu tama dia 2 ne’e  hotu ona maibe laos intepretasaun hanesan ne’e”, dehan Komisariu Faustino da Costa iha ponto entrada Tasi-Tolu.

Faustino haktuir  Polisia Nasional Timor-Leste(PNTL) só fo deit autorizasaun ba sidadaun sira ne’ebé iha karta  autorizasaun husi Sala Situasaun Sentru Integradu Jestaun Krise(SIJK) mak bele sai ba munisípiu.

“Sira ne’ebé iha karta autorizasaun husi sala situasaun ou parte relevante ne’ebé iha autorizasaun para atu halo deslokasaun ida ne’e maka sei halao nafatin hanesan baibain”, esplika.

Elisitu dos Santos, komunidade ne’ebé ohin dader ba iha Hera atu fila munisípiu, hateten nia intensaun hakarak sai ba munisípiu tamba oras ne’e dadauk  hela iha uma arrendada ka kos.Estudante husi Universidade Nasional Timor-Lorosa’e(UNTL), semester hitu ne’e, hateten tan katak oras ne’e dadauk nia hasoru problema finanseiru hanesan osan laiha atu selu kos no atu sosa ai-han ba konsumu nune’e nia deside atu fila ba munisípiu.

“Ferik katuas hela hotu iha foho, entaun preokupasaun ne’ebé mak hau hasoru maka hanesan fos laiha, osan atu lori tuir eskola online no ba sosa pulsa eletrisidade mos laiha ona”, dehan nia.

Entretanto observasaun jornalista Rádio Komunidade Komoro iha pontu entrada no saída sira nota katak sidadaun besik rihun ida resin mak tenta atu sai ba  munisípiu maibé autoridade seguransa asegura hodi la admite sidadaun sira liu.

 

Jornalista : Oki Ganna.

 

Kona-ba Autor: Radio Comunidade Comoro

Gravatar Image
Radio Comunidade Comoro (RCC) nu’udar organizasaun mídia komunitáriu ne’ebé non-lukru no hetan inisiativa no partisipasaun másimu husi komunidade, liu-liu joventude sira ne’ebé iha ispíritu voluntarizmu a’ás hodi kontibui ba vizaun no misaun RCC nian.

Comment